Bandaríski verkfræðingurinn Burt Rutan telur að geimferðir geti kostað litlar sextíu þúsund krónur innan tíu ára. Að minnsta kosti vill hann gera það mögulegt að innan tíu ára geti fólk skellt sér í ferðir út í geiminn án þess að þurfa að greiða fyrir það fúlgur fjár.

Rutan er einna frægastur fyrir að hanna fyrstu flugvélina sem flaug umhverfis hnöttinn án þess að stöðva.

Nýtur hann stuðnings fjárfestisins og ævintýramannsins Richard Branson, eiganda Virgin-fyrirtækisins. Rutan hannar nú geimfar sem er ætlað að flytja almenna borgara út í geiminn fyrir tiltölulega lítinn pening.

Hann býst við að þeir sem hafi áhuga á að kaupa ferðir út í geiminn séu um hundrað þúsund talsins og vonast hann til að einhverjir af þeim hafi áhuga á að fjárfesta í verkefninu.