„Jóhanna Sigurðardóttir verður að eiga það við sig hvernig hún orðar hlutina og hvaða augum hún lítur sitt samstarfsfólk,“ segir Ögmundur Jónasson, þingmaður Vinstri grænna, um ummæli Jóhönnu Sigurðardóttur forsætisráðherra á flokksstjórnarfundi Samfylkingarinnar á Hótel Loftleiðum í gær.

Þar sagði Jóhanna of mikinn kraft fara í að fá meirihluta fyrir málefnum ríkisstjórnarinnar inn á Alþingi og að smala saman meirhluta væri jafn erfitt og að smala saman köttum. Þessi ummæli hafa farið fyrir brjóstið á þingmönnum Vinstri grænna sem ætla að funda um málið á morgun.

„Ég ætla ekki að fella neina þunga dóma um hennar ummæli en mér hefur hugnast það illa að horfa til einhverskonar hjarðmennsku þegar stjórnmálin eru annarsvegar. Það hefur komið okkur illa í seinni tíð að haga stjórnmálum á þann veg að fólk sé sett í dilka eins og kindur í rétt og hvort talað er um sauðfé eða ketti gildur nú litlu. Ég tel hugsun af þessu tagi ekki við hæfi,“ segir Ögmundur í samtali við DV.is.