Engar sönnur er hægt að færa á að starfsmaður Landsbanka Íslands hafi rætt við starfsmann Ríkislögreglustjóra árið 2006 um 30 milljarða króna ríkisskuldabréf frá Venesúela sem Jón Gerald Sullenberger reyndi að koma í umferð í bankanum.

Starfsmaður ríkislögreglustjóra kveðst ekki muna til þess að hafa talað við Landsbankamenn vegna málsins í síma og engin gögn er að finna. FME kannar hvort Landsbankamenn hafi rofið þagnarskyldu með því að ræða við blaðamann DV.

DV greindi í lok nóvember og byrjun desember síðastliðins frá tilraunum Jóns Geralds til að koma umræddum skuldabréfum í umferð í Landsbankanum í ágúst 2006.

Orð embættis Ríkislögreglustjóra stóðu gegn orðum heimildarmanna innan Landsbankans um það hvort réttilega hefði verið tilkynnt um grunsemdir um peningaþvætti.

Ríkislögreglustjóri sendi Ríkissaksóknara bréf þann 8. desember síðastliðinn þar sem farið var fram á að saksóknari tæki málið til meðferðar.Skera yrði úr um hvort einhverjir kynnu að hafa framið refsiverða háttsemi.

Valtýr Sigurðsson ríkissóknari tók málið upp og ritaði Landsbanka Íslands hf bréf og óskaði svara við 5 spurningum. Hann benti á að skylt væri að að láta athuga gaumgæfilega öll viðskipti sem grunur léki á að rekja mætti til peningaþvættis.

Svar barst frá gamla Landsbankanum 19. janúar síðastliðinn. Þar er staðfest að Jón Gerald Sullenberger hafi óskað eftir að umrædd ríkisskuldabréf yrðu tekin í umsýslu en ekkert orðið af því. Af hálfu starfsmanna bankans hafi ekki verið litið á milligöngu Jóns Geralds sem tilraun til peningaþvættis enda var ekki að sjá að móttaka skuldabréfanna fæli í sér ávinning af refsiverðu brot. Því hafi bakinn ekki talið sér skylt að tilkynna ríkislögreglustjóra um peningaþvætti.

Engu að síður hefði þáverandi ábyrgðarmaður bankans gegn peningaþvætti og fjármögnun hryðjuverka tilkynnt um málavöxtu símleiðis til starfsmanns ríkislögreglustjóra. Á þeim tíma hafi verið algengt að mál af þessum toga væru rædd óformlega. „Engin gögn séu til um slík óformleg samskipti,“ segir í greinargerð ríkissaksóknara, sem dagsett er 10. mars síðastliðinn.