Útrásarvíkingarnir eru ekki einu Íslendingarnir sem farið hafa á Annabels Club í London en DV greinir frá því í dag að Bakkabræður hafi skemmt sér þar ásamt Hreiðari Má Sigurðssyni fyrr í mánuðinum.

Þannig mun Tryggvi Þór Herbertsson, þingmaður Sjálfstæðisflokksins og fyrrverandi forstjóri Askar Capital, hafa skemmt sér á klúbbnum víðfræga árið 2007. Þá gegndi Tryggvi enn forstjórastarfinu í fjárfestingabanka þeirra Wernersbræðra og hefur örugglega ekki væst um hann á Annabels innan um allar stjörnurnar sem þar ala manninn að öllu jöfnu.

Eins og fram kemur í DV í dag skelltu Lýður og Ágúst Guðmundssynir sér á einkaklúbbinn Anabels í Mayfair í London fyrr í mánuðinum til að fagna því að nauðasamningar Bakkavarar hefðu verið samþykktir. Með þeim í för var Hreiðar Már Sigurðsson, fyrrverandi forstjóri Kaupþings og núverandi íbúi í Lúxemborg, auk fleiri Íslendinga.