Móðir sjö ára gamallar stúlku hefur kært Árbæjarapótek til Lyfjastofnunar eftir að dóttir hennar fékk og innbyrti tífaldan skammt af sýklalyfinu Furadantin um helgina vegna mistaka í apótekinu.

Lyfið var ávísað vegna blöðrubólgu sem stúlkan fékk í síðustu viku og segir í Fréttablaðinu í dag að móðir stúlkunnar þakki sínum sæla fyrir að lyfið hafi ekki verið skaðlegra en raun ber vitni.

Haft er haft Rannveigu Gunnarsdóttur, forstjóra Lyfjastofnunar, að kannað verði hvað fór úrskeiðis og síðan óskað eftir viðbrögðum lyfsala.

Lyfjafræðingur Árbæjarapóteks segir sömuleiðis í samtali við blaðið að hann harmi mistökin og að allt verði gert til að slíkt endurtaki sig ekki.