Sigurður G. Guðjónsson hæstaréttarlögmaður segir að milljarðurinn sem eignarhaldsfélag Pálma Haraldssonar, Fons, lagði inn á persónulegan tékkareikning Jóns Ásgeirs Jóhannessonar sumarið 2008 hafi ekki verið gjöf til Jóns Ásgeirs.

„Þetta var nú ekki gjöf til Jóns Ásgeirs. Enda held ég að engum hefði dottið í hug að gefa Jóni Ásgeiri einn milljarð,“ segir Sigurður G. Þrotabú Fons hefur stefnt Jóni Ásgeiri á þeim forsendum að milljarðurinn frá Fons til Jóns Ásgeirs hafi verið gjafagerningur og vill skiptastjórinn, Óskar Sigurðsson, rifta greiðslunni.
Sigurður G. er lögmaður Jóns Ásgeirs í málinu en stefnan í því var þingfest þann 25. febrúar síðastliðinn. Stefnan er ein af 10 stefnum þrotabús Fons sem þingfest var í Héraðsdómi Reykjavíkur þennan dag.

Sigurður G. segir að milljarðurinn hafi verið hluti Fons af sameiginlegri fjárfestingu félagsins og eignarhaldsfélags í eigu Jóns Ásgeirs, Þú Blásól ehf., í formúluliðinu Williams. Pálmi Haraldsson og Jón Ásgeir voru viðskiptafélagar á árunum fyrir hrunið og fjárfestu meðal annars í ýmsum verslunum í Bretlandi, til dæmis í Hamleys-leikfangabúðakeðjunni og Iceland-keðjunni.

Sigurður segir aðspurður að milljarðurinn frá Fons hafi verið notaður til að greiða fyrir auglýsingasamning Hamleys við Williams-liðið, Jón Ásgeir hafi svo lagt til sinn hluta af fjárfestingunni í gegnum Þú Blásól. „Þessir peningar fóru til Williams-liðsins þar sem Hamleys auglýsti á formúlubílunum þeirra og flutningatækjum. Þessum peningum var því bara ráðstafað í verkefni sem félög á þeirra vegum höfðu staðið í, og stóðu í allt til loka árs 2008,“ segir Sigurður G. sem einnig gætir hagsmuna Pálma í einhverjum af þeim málum sem þrotabú Fons hefur höfðað gegn honum persónulega.