Ágreiningur um grundvöll frekari viðræðna milli Íslendinga annars vegar og Breta og Hollendinga hins vegar hefur orðið til þess að engir fundir hafa verið boðaðir. Fyrir síðustu helgi lagði íslenska samninganefndin fram plagg sem átti að vera upplegg fyrir framhald viðræðna um lausn Icesave-deilunnar.

Að því er fram kom í kvöldfréttum RÚV voru hinsvegar fjölmargar athugasemdir gerðar og frekari viðræðum á grunvelli þess var hafnað. Þrátt fyrir þetta hafa óformleg samskipti verið síðustu daga við Breta og Hollendinga um lausn deilunnar þó engir fundir hafi verið formlega boðaðir.

Í fréttum RÚV var haft eftir Guðmundi Árnasyni, ráðuneytisstjóra í fjármálaráðuneytinu sem einnig situr í samninganefndinni, að viðræðurnar hefðu tafist. Þá var haft eftir Steingrími J. Sigfússyni fjármálaráðherra að unnið sé að því að koma á fundum með Bretum og Hollendingum í þessari viku en ekkert sé fast í hendi.