„Af því að pabbi hans er dáinn fáum við enga greiðslu neins staðar sem við annars fengjum ef hann væri á lífi. Þá hefðum við getað farið til sýslumanns og beðið föðurinn um að borga helming á móti, en þar sem hann er ekki á lífi er það ekki í boði,“ segir Erla Sverrisdóttir, móðir einhverfs drengs sem fermist í vor.

Henni finnst ósanngjarnt að kerfið neiti henni um greiðslur, sem hún annars fengi, ef faðirinn væri á lífi, til að greiða kostnað af fermingarveislu drengsins. Erla segir að um réttlætismál sé að ræða og ætlar ekki að leita á náðir Félagsþjónustunnar sem hún segir eina mögulega aðilann sem hjálpi til við fermingarveislur í sams konar aðstæðum.