Ungur Þjóðverji var handtekinn í Þýskalandi á dögunum þegar kærastan hans tilkynnti að verið væri að brjótast inn í íbúðina þeirra. Stúlkan var ein heima þegar hún heyrði umgang á svölunum skömmu eftir miðnætti kvöld eitt í vikunni.

Stúlkan taldi að þarna væri innbrotsþjófur á ferð og hringdi því umsvifalaust á lögregluna. Lögregla var fljót að bregðast við og örfáum mínútum síðar var hún komin á vettvang. Komu lögregluþjónarnir auga á ungan mann á svölunum sem var að reyna að komast inn í íbúðina.

Um leið og maðurinn varð var við lögregluna stökk hann niður af svölunum og reyndi að flýja á hlaupum. Skildi hann eftir rauðvínsflösku og blómvönd á svölunum þegar hann flúði. Um leið og hann var handtekinn útskýrði hann fyrir lögreglu hver raunverulegur tilgangur hans var – að koma elskunni sinni á óvart.