Lögreglan á höfuðborgarsvæðinu hafði hendur í hári ökumanns seint í gærkvöldi sem virti ekki merki lögreglunnar um að stöðva. Svo fór að maðurinn missti stjórn á ökutæki sínu þegar hann ók á töluverðum hraða niður Lyngháls og endaði á bílastæðinu við Lögregluskólann.

Að sögn varðstjóra hjá lögreglunni á höfuðborgarsvæðinu vaknaði grunur hjá lögreglu um að ökumaðurinn væri án ökuréttinda. Sá grunur reyndist á rökum reistur en þegar lögregla gaf manninum merki um að stöðva jók hann hraðann.

Þegar maðurinn var kominn niður Lynghálsinn voru í raun tveir góðir kostir í stöðunni og einn slæmur. Þeir góðu voru að beygja annað hvort til hægri eða vinstri en sá slæmi að halda áfram yfir grasblett og enda ökuferðina á bílastæði Lögregluskóla ríkisins. Svo fór að maðurinn ók beint áfram og yfir kant. Endaði bifreiðin á bílastæðinu fyrir neðan stórskemmd.

Maðurinn, sem er á sjötugsaldri, reyndi því næst að flýja undan lögreglu á hlaupum en lögregluþjónar sem veittu honum eftirför voru fljótir að hlaupa hann uppi.