Nóvembermánuður síðastliðinn var viðburðaríkur hjá Sævari Jónssyni, eiganda Leonards og fyrrverandi knattspyrnuhetju, en þá færði hann rekstur skartgripa- og úraverslunar sinnar yfir á nýja kennitölu og gerði kaupmála við eiginkonu sína þannig að verslunin fluttist yfir á hana í hinu nýja fyrirtæki. Í síðustu viku var hann sjálfur úrskurðaður gjaldþrota.

Fram í nóvember 2009 var rekstur Leonards undir félagi sem hét Leonard ehf. þar sem Sævar var skráður í stjórn, sem framkvæmdastjóri og með prókúruumboð fyrirtækisins. Þá var skyndilega gerð nafnabreyting á fyrirtækinu og því breytt í Ince ehf. en samkvæmt ársreikningi 2008 hvíldu þar talsverðar skuldir.

Í þessum sama mánuði, nóvember 2009, var síðan stofnað nýtt fyrirtæki, Leonard ehf., sem heldur utan um rekstur búðanna en sú breyting er á nýja fyrirtækinu að þar er eiginkona Sævars, Helga Daníelsdóttir, komin með öll völd, bæði í stjórn og með prókúruumboð.