Síðasti meðlimur forns ættbálks sem búið hefur á Andaman-eyjum í um 65.000 ár er látinn, að sögn samtaka sem barist hafa fyrir vernd frumbyggja eyjanna.

Í tilkynningu frá samtökunum Survival International lést Boa, sem var hálfníræð, í síðustu viku á Andaman-eyjum en hún var síðasti eftirlifandi Bo-ættbálksins, eins af tíu aðskildum ættbálkum sem byggt hafa eyjarnar.

„Talið er að Bo-ættbálkurinn hafi lifað á Andaman-eyjum í allt að 65.000 ár sem gerir hann að afkomendum eins elsta menningarsamfélags jarðar,“ sagði í tilkynningunni frá Survival International.

Endalok fornrar tungu
Tungumálasérfræðingar segja að með fráfalli Boa hafi Indland aukinheldur glatað því tungumáli sem var í mestri hættu. Tungumálið heitir Bo og Boa var sú síðasta sem tjáði sig á því, en undir það síðasta hafði hún engan til að tala við á því tungumáli þar sem eiginmaður hennar og börn voru þegar látin.

Anvita Abbi, prófessor og verkefnastjóri við Jawaharlal Nehru-háskólann í Nýju Delí, hitti Boa á síðasta ári og sagði að hún hefði verið eina manneskjan sem mundi gömlu söngva ættbálksins. Abbi sagði einnig að Boa hafi auk Bo-tungumálsins kunnað aðrar Andaman-mállýskur.