Ástralskar tvíburasystur komust að því að bróðir þeirra hafði látist í hræðilegu umferðarslysi á samskiptavefnum Facebook. Komust stúlkurnar að hinu rétta þegar þær lásu samúðarkveðjur frá sameiginlegum vinum og virðist lögreglu hafa láðst að láta systurnar vita.

Bróðir systranna hét Bobby og var hann sautján ára gamall þegar hann lést í slysinu sem varð í vesturhluta Sydney. Tveir vinir hans létust einnig í slysinu, nítján ára vinur hans og fimmtán ára gömul vinkona. Varð slysið með þeim hætti að ökumaðurinn missti stjórn á bifreiðinni í mikilli rigningu með þeim afleiðingum að hann endaði á ljósastaur.

Í örvæntingu sinni reyndu systurnar að ná í bróður sinn í gegnum síma. Sex klukkustundum eftir að þær lásu skilaboðin fékk móðir þeirra það loks staðfest að sonur hennar og bróðir stúlknanna væri látinn.

Lögreglan í Sydney hefur varið þá ákvörðun sína að láta fjölskylduna vita þar sem ekki tókst að bera kennsl á lík piltsins í fyrstu. „Það er martröð hvers foreldris að missa barnið sitt í bílslysi, en að þurfa að lesa um það á Facebook og síðan þurfa að hafa samband við lögregluna til að fá það staðfest er hræðilegt,“ segir Peter Matelis, frændi piltsins.