Sparifé íslenskra fjárfesta sem lögðu peninga inn í píramídafélagið Finanza Forex, sem skráð er í Panama, var fryst af bandaríska fíkniefnaeftirlitinu DEA, vegna gruns um að fyrirtækið væri notað til að þvætta risastóran fíkniefnagróða. Félagið er í málaferlum í Bandaríkjunum vegna málsins. Sjóðir Finanza Forex eru nú komnir í frost eftir aðgerðir bandarískra yfirvalda.

Sigurður Örn Leósson sem er einn þeirra sem kynnti fyrirtækið hér á landi, náði að sannfæra mörg hundruð manns að leggja sparifé sitt inn í félagið í von um skjótan ofsagróða á gjaldeyrisbraski. Samkvæmt heimildum DV tók hann og fleiri sem stunduðu umfangsmikla kynningarstarfssemi á félaginu hér á landi, allt að fimm prósent í þóknun af öllum peningum sem komu inn í félagið hér á landi.

Þeir sem lögðu fé fyrstir inn í FFX græddu vel á meðan þeir sem komu síðar töpuðu öllu. Fyrrverandi gjaldeyrismiðlari segir við DV að nærri öruggt sé að Íslendingarnir hafi tapað öllu sínu sparifé.