31 árs gamall karlmaður frá Indiana í Bandaríkjunum var hætt kominn þegar hann festi bíl sinn í snævi þöktum óbyggðum Colorado um helgina.

Maðurinn, sem heitir Jason Pede, festi bíl sinn á fimmtudag en það varð þó ekki fyrr en aðfaranótt sunnudags sem honum varð ljós að engin hjálp væri á leiðinni. Brá hann því á það ráð að ganga sem leið lá að öðrum vegi, eða um 11 kílómetra, þar sem honum tókst að ná athygli vegfaranda sem höfðu samband við lögreglu.

Maðurinn var á leið til fjallaparadísarinnar Aspen þegar hann festi bílinn. Í samtali við bandaríska fjölmiðla segir maðurinn að hann hafi komið í veg fyrir ofþornun með því að drekka Mountain Dew.