Ráðist var á færeyskan leikmann Keflavíkur í meistaraflokki karla í knattspyrnu, Simun Eiler Samuelsen, í síðustu viku og hann nefbrotinn. Atburðurinn átti sér stað í kveðjuhófi fyrir leikmanninn á skemmtistaðnum Glóðinni í Reykjanesbæ.

Simun ákvað að leika ekki lengur með Keflavíkurliðinu og gerði samning við lið í heimalandinu. Félagar hans í Keflavíkurliðinu hittust margir kvöldið áður en leikmaðurinn hélt heim til Færeyja. Í kveðjuhófinu var ráðist á Færeyinginn og hann skallaður í andlitið með þeim afleiðingum að nef hans brotnaði.