Gordon Brown, forsætisráðherra Bretlands, beygði af í viðtali við Piers Morgan í spjallþætti hans sem tekinn var upp um helgina. Það var tilfinningaþrungin stund í sjónvarpssal þegar ráðherrann ræddi andlát dóttur sinnar Jennifer sem lést árið 2002, aðeins tíu daga gömul.

Viðtalið var tekið upp fyrir þátt Morgan, Life Stories, fyrir framan áhorfendur en þátturinn verður sýndur á ITV-sjónvarpstöðinni um næstu helgi. Daily Mail hefur fengið að vita hvað gekk á í þættinum og greinir frá því á vef sínum í dag.

Sarah, eiginkona Gordons Brown, var einnig í sjónvarpssal og grétu þau saman þegar talið barst að erfiðleikunum í einkalífi þeirra.

Brown sagði frá þeirri stundu þegar honum var tjáð að nýfædd dóttir hans myndi ekki lifa af. Hún lést af völdum heilablæðingar aðeins tíu daga gömul árið 2002.

Brown ræddi einnig um son sinn Fraser, sem þjáist af sjaldgæfum erfðasjúkdóm, og hvernig ekki hafi verið útséð með hvort hann myndi lifa af. Ráðherrann heldur enn í vonina um að lækning finnist við slímseigjusjúkdómnum sem sonur hans fæddist með. Lífslíkur Frasers eru ekki taldar miklar.

„Hann lýsti því hvernig hann hélt í agnarsmáa hönd hennar þar til yfir lauk,“ hefur Daily Mail eftir einum áhorfanda í sjónvarpssal þegar Brown ræddi um andlát dóttur sinnar. Jennifer, dóttir þeirra hjóna, lést í örmum foreldra sinna.

Brown hefur í gegnum tíðina þótt heldur fálátur en hann opnar sig og sýnir af sér nýjar hliðar í viðtalinu við Piers Morgan.