„Já, já, við höfum svo sem alveg átt samskipti. Er það eitthvað óeðlilegt?“ spyr Guðmundur Ólason, fyrrverandi forstjóri Milestone, þegar hann er spurður um það hvort Bjarni Benediktsson hafi átt í samskiptum við fyrrverandi eigendur og stjórnendur Milestone eftir að DV byrjaði að fjalla um Vafningsmálið í desember.

Guðmundur segir að Bjarni hafi haft samband við sig til að ræða um Vafningsmálið.

Guðmundur segir jafnframt að Bjarni og eigendur og stjórnendur Milestone hafi ekki átt fund út af Vafningsmálinu upp á síðkastið. Bjarni var spurður að þessu atriði í viðtali við Helga Seljan í Kastljósi á miðvikudaginn og neitaði Bjarni því að hafa fundað með þeim Milestone-mönnum.

Orð Guðmundar staðfesta að samskipti hafi átt sér stað á milli Bjarna og Milestone þó að eiginlegur fundur hafi ekki verið haldinn.