Miklar vangaveltur hafa verið um hvort það voru starfsmenn FME eða íslenska Seðlabankans sem „lugu“ að Arnold Schilder, fyrrverandi yfirmanni innra eftirlits hollenska seðlabankans. Af orðum hans fyrir hollenskri þingnefnd þess efnis að íslenskir starfsbræður hans hefðu logið að honum mátti skilja hvort heldur sem var.

Í rafrænum pósti sem Schilder sendi DV vísaði hann spurningunni um hvort hann hafi verið að tala um FME eða Seðlabanka Íslands til seðlabanka Hollands. Tobias Oudejans, talsmaður hollenska seðlabankans, tók í samtali við blaðamann DV af öll tvímæli varðandi orð Schilders.

Oudejans sagði að Schilders hefði átt við FME þegar hann sagði að starfsbræður hans hefðu logið að honum. „Schilders átti við FME, hann átti ekki við Seðlabanka Íslands,“ sagði Oudejans.

Oudejans neitaði hins vegar að tjá sig um hverjir það voru nákvæmlega sem Schilders var í samskiptum við hjá FME, og að sögn hans „lugu“ að honum.