Þrettán ára piltur tók bíl foreldra sinna í leyfisleysi á Ísafirði undir hádegi í dag og ók honum á ljósastaur. Höggið við ákeyrsluna var svo mikið að ljósastaurinn féll um koll og lenti á fjórum kyrrstæðum bílum sem skemmdust töluvert.

Að sögn varðstjóra hjá lögreglunni var pilturinn einn í bílnum en óhappið átti sér stað á Fjarðargötu. Bíllinn sem pilturinn var á skemmdist mikið en að sögn lögreglu var það lán í óláni að enginn var á ferð í kringum bílana þegar ljósastaurinn féll. Piltinn sakaði ekki.