45 ára gömul kólumbísk kona, Noela Serna, skaut útfararstjóra skelk í bringu þegar hún reis upp frá dauðum – eða þannig. Konan hafði fengið hjartaáfall en komist undir læknishendur í tæka tíð. Eftir að hafa dvalið í nokkra stund á sjúkrahúsi var hún hinsvegar úrskurðuð látin þar sem læknar fundu engan púls.

Konan var því færð í líkhús sjúkrahússins og þaðan til útfararstjóra. Þar vaknaði konan hinsvegar upp – útfararstjóranum til mikillar skelfingar. Konan var flutt aftur undir læknishendur og er hún nú búin að ná sér að fullu.

Talið er að konan hafi þjáðst af svokölluðu Lazarus-heilkenni sem er tilvitnun í Biblíuna - en Jesús á að hafa lífgað mann að nafni Lazarus við eftir að hann var látinn.