Slysið sem varð um borð í skipinu Hoffelli í Fáskrúðsfirði þann 14. febrúar síðastliðinn, þegar tveir menn misstu meðvitund og voru hætt komnir þegar þeir voru að landa gulldeplu úr lest skipsins, er ekkert einsdæmi hér á landi.

Að minnsta kosti fjögur önnur sambærileg slys af völdum eiturgass hafa orðið í skipum hér á landi síðastliðin sjö ár, samkvæmt upplýsingum frá rannsóknarnefnd sjóslysa sem heldur skrá um slík slys. Svo virðist sem súrefni klárist mjög fljótt ofan í slíkum lestum þegar innyfli uppsjávarfiska eru byrjuð að rotna.

Árið 2006 voru tveir skipverjar á Aðalsteini Jónssyni að þrífa eftir löndun í tanki skipsins þegar þeir fóru skyndilega að finna fyrir andnauð og slappleika. Í ljós kom að skipstjórinn hafði fyrir mistök dælt ósoni inn á meðan mennirnir voru í tanknum. Þeir þurftu aðhlynningu á sjúkrahúsi eftir atvikið.