Jóhanna Sigurðardóttir forsætisráðherra á ekki von á öðru en að þjóðaratkvæðagreiðslan um Icesave-lögin verði á tilsettum tíma, eða þann sjötta mars næstkomandi. Það muni ráðast þegar niðurstaðan úr viðræðunum við Breta og Hollendinga liggur fyrir.

Þetta kom fram í kvöldfréttum RÚV. Jóhanna sagði einnig að óljóst væri hvenær skýrsla rannsóknarnefndar Alþingis birtist en til stendur að birta hana um mánaðamótin – að óbreyttu. Jóhanna átti fund með Páli Hreinssyni, formanni rannsóknarnefndarinnar, í gærkvöldi og segir Jóhanna að Páll hafi ekki getað sagt til um hvenær skýrslan kæmi út.

Íslenska samninganefndin, sem verið hefur í Lundúnum síðan á mánudag, kom heim í gærkvöldi. Í fréttum RÚV kom fram að Bretar og Hollendingar hafi ekki getað fallist á upplegg Íslands í viðræðunum og er viðbragða að vænta frá Bretlandi á morgun.

Fréttastofa Reuters greindi frá því í dag að Hollendingar og Bretar ætli að senda nýtt tilboð til Íslands á morgun. Það feli meðal annars í sér að vextirnir af Icesave-skuldbindingunum verði breytilegir en ekki fastir eins og gert hafði verið ráð fyrir. Sagði heimildamaður Reuters að tilboðið væri of gott til að hafna því fyrir Íslendinga.