Ástin getur fengið fólk til að gera ótrúlegustu hluti. Vefútgáfa þýska blaðsins Spiegel segir frá 33 ára gömlum Þjóðverja sem braust inn í kvennafangelsi í borginni Bielefeld, kvöld eftir kvöld, til að gamna sér með kærustunni sinni.

Upp komst um málið í nóvember á síðasta ári en kærasta mannsins var að afplána dóm vegna fíkniefnabrota. Eftir að lögregla lauk rannsókn málsins var málið sent til saksóknara sem nú hefur gefið út ákæru á hendur manninum. Mun dómari ákveða örlög mannsins í mars.

Aðrir fangar í kvennafangelsinu höfðu kvartað undan hávaða úr klefa konunnar og vissu sem var að ekki var allt með felldu – að minnsta kosti bentu hljóðin til þess. Fangelsisyfirvöld brugðu því á það ráð að koma fyrir eftirlitsmyndavél fyrir framan klefa konunnar og náðist maðurinn kvöld eitt í nóvember. „Ég elska hana – við erum trúlofuð,“ hrópaði maðurinn að lögreglu þegar hann var leiddur burt í handjárnum.

Lögmaður mannsins finnst ákæran tilefnislaus og þegar málið var tekið fyrir á dögunum fyrir dómstólum lagði hann til málið yrði látið niður falla. „Getum við ekki bara hlegið að þessu í þetta eina skipti og gleymt þessum réttarhöldum?,“spurði lögmaður mannsins.

Dómaranum var hinsvegar ekki skemmt og ákvað að dómur skuli falla í næsta mánuði.