Breski sendiherrann á Íslandi reyndi fyrir um mánuði síðan að fá Norðmenn til að axla ábyrgð á Icesave-skuldinni. Þetta kemur fram í leyniskjali sem Sam Watson, sem veitir bandaríska sendiráðinu forstöðu, sendi til Bandaríkjanna fyrir skemmstu.

Þetta kom fram í kvöldfréttum RÚV en fréttastofa hefur gögnin undir höndum.

Í frétt RÚV kom fram að breski sendiherrann hafi tjáð bandarískum starfsbróður sínum að bresk stjórnvöld gætu mögulega fallist á leiðir sem kæmu í veg fyrir þjóðaratkvæðagreiðslu um Icesave. Bréfið sem um ræðir er dagsett þrettánda janúar eða viku eftir að Ólafur Ragnar Grímsson synjaði Icesave-lögunum.

Í bréfinu greinir Watson frá fundum sem hann á með fulltrúum íslenskra stjórnvalda um Icesave-málið og með Ian Whiting, sendiherra Bretlands á Íslandi. Í endursögn af fundum þeirra kemur fram að breski sendiherrann segi að eigin stjórn gæti verið reiðubúin að skoða kosti sem kæmu í veg fyrir þjóðaratkvæagreiðslu.

Greindi Whiting Watson frá því að hann væri að kanna lausn deilunnar sem fælist í að Norðmenn myndu veita lán til Íslendinga fyrir allri Icesave-skuldinni. Þannig gætu báðir aðilar lýst yfir sigri – Bretar og Hollendingar fengju sína peninga og Íslendingar myndu síðan semja við Norðmenn um endurgreiðslu á hagstæðari kjörum.