Hæstiréttur hefur dæmt Erlu Hlynsdóttur, blaðamann DV, til að greiða Helgu Haraldsdóttur, eiginkonu Guðmundar í Byrginu, 400 þúsund krónur í bætur vegna ummæla sem höfð voru eftir Ólöfu Ósk um Helgu í DV þann 31. ágúst 2007. Héraðsdómur Reykjavíkur hafði áður dæmt Erlu til að greiða Helgu 100 þúsund krónur.

Helga stefndi, auk Erlu, tveimur viðmælendum hennar, þeim Magnúsi Einarssyni og Ólöfu Ósk Erlendsdóttur, fyrir meiðyrði. Þar greindu þau frá þætti Helgu í Byrgismálinu, þar sem Erla hafði meðal annars eftir Ólöfu að Helga væri kolrugluð og henni fyndist ekki við hæfi að hún ynni í grunnskóla í ljósi hugaróra Guðmundar um stelpur á grunnskólaaldri.

Ólöf Ósk og Magnús báru því við að rangt hafi verið eftir þeim haft í greininni. Þá krafðist Helga þess að fjórtán ummæli sem birtust í greininni yrðu dæmd dauð og ómerk en dómari féllst aðeins á að ein ummæli yrðu dæmd ómerk: „... ekki við hæfi að sú sem veiðir fyrir hann vinni við grunnskóla.“ 

Var það mat dómara að með þessum orðum hafi verið gefið til kynna að Helga hafi gerst sek um refsivert athæfi, sem ekki hefði verið sannað. Þar sem ekki voru leiddar sönnur að því að þessi ummæli hefðu verið höfð eftir Ólöfu var talið að Erla bæri skaðabótaábyrgð.

Ástæða þess að hin ummælin, meðal annars: „Ólöf Ósk Erlendsdóttir ... segir Helgu hafa tekið þátt í kynlífsathöfnum með sér og Guðmundi,“ og „Ólöf Ósk Erlendsdóttir segir Helgu hafa verið virka í kynlífsleikjum þeirra Guðmundar til að byrja með en þegar líða tók á hafi Helga orðið mjög afbrýðisöm og þá hafi Guðmundur ekki lengur viljað hafa hana með,“ leiddu ekki til sakfellingar var sú að þegar Guðmundur var sakfelldur fyrir þátt sinn í Byrgismálinu hafi verið lagður framburður vitna sem báru að Helga hefði verið þátttakandi í kynlífsathöfnum hans og vistkvennanna með hliðstæðum hætti og lýst var í nokkrum ummælum sem höfð voru eftir viðmælendum greinarinnar.

Helga krafðist þess að fá þrjár milljónir í bætur en dómari taldi 400 þúsund hæfilegar, 300 þúsund í skaðabætur og 100 þúsund krónur til birtingar dómsins.