Ráðstafanir bankanna eru ekki endilega til þess fallnar að auka viðskiptasiðferði segir Skúli Helgason þingmaður Samfylkingarinnar. Hann vill takmarka aðgang fyrri eigenda, sem ekki eiga fyrir skuldum, að stjórnun og eignarhaldi stórfyrirtækja.

Hann tók málið upp á upphafi þingfundar á Alþingi í dag og gat sérstaklega um skuldir Samskipa og Haga við Arionbanka. „Eitt alvarlegasta dæmið sem nefnt hefur verið tengist meðferð Arion banka á fyrirtækinu Samskipum þar sem fyrri eigandi sem hefur réttarstöðu grunaðs í umfangsmiklu fjársvikamáli mun eiga að fá fyrirtækið í sínar hendur að lokinni skuldameðferð. Annað dæmi tengist meðferð sama banka á fyrirtækinu Högum. Ég tel reyndar að þar sé eðlisólíkt mál á ferðinni því fyrirhugað er að setja það fyrirtæki á markað í opnu og gegnsæju söluferli þar sem fyrri eigendur muni greiða sama verð og aðrir fyrir eignarhluti. Hins vegar má gagnrýna að fyrri eigandi skuli eiga að njóta forkaupsréttar á tilteknum hlut í fyrirtækinu í því ferli.“

Skúli sagði að viðskiptanefnd Alþingis hefði til umfjöllunar samræmdar verklagsreglur bankanna varðandi skuldameðferð fyrirtækja. Ljóst væri af þeim regludrögum, sem þar lægju fyrir, að bankarnir virtust fyrst og fremst leggja til grundvallar hámörkun arðsemi til skemmri tíma en gættu þess ekki nægilega vel að læra af þeirri reynslu sem steypt hefði fjármálakerfinu í glötun og lagt þungar byrðar á herðar almennings í landinu. Mjög skorti á að þess væri freistað að auka viðskiptasiðferði eða traust almennings á þessu ferli.
Skúli vill takmarka aðgang fyrri eigenda, sem ekki greiða lengur skuldir sínar, að eignarhaldi og stjórnun stórfyrirtækja.

„Í fyrsta lagi er nauðsynlegt að kanna til hlítar hvernig setja megi skorður við því að stjórnendur stórfyrirtækja sem hafa komið þeim í þá stöðu að þau geta ekki greitt skuldir sínar, geti ekki fengið sömu fyrirtæki í hendur að lokinni skuldameðferð bankanna.
Í öðru lagi verði þess gætt að öll fyrirtæki yfir tiltekinni stærð fari í almennt opið söluferli þar sem allir fjárfestar sitji við sama borð en fyrri eigendur og stjórnendur njóti þar ekki forréttinda.
Í þriðja lagi að almenningur og fjölmiðlar hafi beinan aðgang að upplýsingum um skuldameðferð fyrirtækja þegar umfang afskrifta fer yfir tiltekið hlutfall sem nánar verði kveðið á um í reglunum.
Síðast en ekki síst þarf að vega og meta til niðurstöðu þau lagalegu og siðferðilegu sjónarmið sem tengjast stöðu einstaklinga með réttarstöðu grunaðra í málum af þessu tagi.
Ég tel að það sé skylda okkar hér í þinginu að gera allt sem í okkar valdi stendur til að vekja athygli á þessum sjónarmiðum,“ sagði Skúli.