Ásbirni Óttarssyni, þingmanni Sjáflstæðisflokksins, þykir skjóta skökku við að segja upp fjölda starfsmanna fréttastofu og landshlutastöðva RÚV á sama tíma og 26 manns starfa hjá markaðsdeild stofnunarinnar.

Ásbjörn tók málið upp í upphafi þingfundar á Alþingi í dag. Hann sagði að brýnt væri að styðja fréttaflutning Ríkisútvarpsins vegna þjóðfélagsástandsins og því væri um rangar áherslur að ræða í niðurskurði hjá RÚV. Hann gat þess að einnig mætti RÚV skera niður kaup á erlendu sjónvarpsefni þegar niðurskurður blasi við.

DV segir frá því í dag að í næsta mánuði verði komið á fót landsbyggðarfréttatíma á Rás 1 eða Rás 2 um leið og svæðisbundnar útsendingar verða lagðar niður. Þá er ætlunin að koma á landsbyggðarþætti í sjónvarpi síðar á árinu. Í svari Bjarna Guðmundssonar framkvæmdastjóra RÚV við fyrirspurnum Magnúsar Más Þorvaldssonar á Vopnafirði kemur fram að stöðugildi verði um 10 á landsbyggðinni eftir niðurskurð hjá RÚV og með núverandi aðgerðum sparist 31 milljón króna við rekstur svæðisstöðvanna.