Það kennir ýmissa grasa í dagbók lögreglunnar á höfuðborgarsvæðinu í dag. Samkvæmt upplýsingum frá lögreglu var kona handtekin fyrir fjársvik á gististað í gær þar sem hún reyndi að nota stolið kreditkort til að borga fyrir gistinguna.

Í herbergi hennar fundust einnig munir sem hún gat ekki gert grein fyrir.

Kannabis í Hafnarfirði
Lögreglan á höfuðborgarsvæðinu stöðvaði kannabisræktun í bílskúr í Hafnarfirði í gær. Við húsleit á áðurnefndum stað var lagt hald á 10 kannabisplöntur og ýmsan búnað sem tengdist starfseminni. Karl um fertugt var færður á lögreglustöð i tengslum við rannsókn málsins og hefur hann játað aðild sína að málinu.

Innbrot í bíla
Brotist var inn í nokkra bíla á ýmsum stöðum í Reykjavík í gær en átta slíkar tilkynningar bárust lögreglunni. Úr þeim var m.a. stolið fartölvu, myndavél, radarvara og greiðslukorti. Sem fyrr ítrekar lögreglan að verðmæti séu ekki skilin eftir í bílum. Sé það óumflýjanlegt er mikilvægt að slíkir hlutir séu ekki í augsýn.

Rúðubrjótur tekinn
Rúðubrjótur var handtekinn í Reykjavík í nótt. Sá braut rúðu í fjölbýlishúsi en ekki er vitað hvað honum gekk til. Rúðubrjóturinn, karl á fimmtugsaldri, var færður í fangageymslu en hann var ölvaður.

Dópaðir í umferðinni
Fimm ökumenn voru teknir í Reykjavík í gær og nótt fyrir að aka undir áhrifum fíkniefna en einn þeirra hafði þegar verið sviptur ökuleyfi. Þetta voru tveir piltar um tvítugt og karl á sextugsaldri og tvær konur á þrítugsaldri en önnur þeirra lenti í umferðaróhappi. Sú var með barn sitt í bílnum en meiðsli beggja voru minniháttar, eftir því að best er vitað. Þá var einn ökumaður tekinn fyrir ölvunarakstur í gær en um var ræða fertuga konu sem var stöðvuð í Kópavogi.