Fjármögnunarfyrirtækið Lýsing mun áfrýja dómi sem féll í Héraðsdómi Reykjavíkur í gær til Hæstaréttar. Segir í yfirlýsingu frá fyrirtækinu að Héraðsdómur Reykjavíkur hafi með skömmu millibili kveðið upp tvo dóma sem varða myntkörfulán og hafi komist að gagnstæðri niðurstöðu í þeim málum.

„ Báðum þessum málum verður áfrýjað til Hæstaréttar sem mun kveða upp endanlegan dóm um þetta álitaefni. Lýsing getur ekki horft til fordæmisgildis þessarar niðurstöðu Héraðsdóms Reykjavíkur fyrr en niðurstaða Hæstaréttar liggur fyrir. Það eru bæði hagsmunir Lýsingar og viðskiptavina okkar að sú niðurstaða liggi fyrir sem fyrst,“ segir í yfirlýsingu frá Lýsingu.