„Mér finnst jákvætt að það sé fallinn dómur á þennan hátt í þessu máli. Í sjálfu sér kemur hann mér ekki á óvart því það var skýrt í lögunum að það mætti ekki verðtryggja lán nema með neysluvísitölu,“ sagði Lilja Mósesdóttir, formaður viðskiptanefndar Alþingis, um dóm Héraðsdóms Reykjavíkur þar sem lántakandi var sýknaður af kröfu fjármögnunarfyrirtækisins Lýsingar.

Lilja segir að ef þessi niðurstaða helst óbreytt þá komi það ekki til með að hafa mikil áhrif á eignasafn bankanna. „Þeir hljóta að hafa gert ráð fyrir því að þetta yrði dæmt ólöglegt þegar verið var að meta eignasöfnin,“ sagði Lilja í samtali við DV.is.

Aðspurð hvort hún hafi vitneskju um að tekið hafi verið tillit til þess þegar eignasöfnin voru metin segist hún ekki hafa fengið upplýsingar um það þrátt fyrir ítrekaða beiðni. „Við höfum ekki fengið að vita hvert verðmæti eignasafns bankanna er miðað við upprunalegt verð,“ sagði Lilja.

Lilja segir viðskiptanefnd ekki geta fundað um málið í næstu viku því dagskráin sé full þrátt fyrir aukafund. Nefndin þarf að taka fyrir verklagsreglur og frumvörp efnahags- og viðskiptaráðherra auk þess sem hún fer í heimsókn í Landsbankann til að kynna sér starfsemi Vestia og Regin.

„Geri ekki ráð fyrir fundi í þessari viku gott að þetta fari í utandagskrárumræðu á þinginu sjálfu,“ sagði Lilja.

Friðrik Ó. Friðriksson, formaður Hagsmunasamtaka heimilanna, sagði í samtali við DV.is að þúsundir lántakenda bíði nú að hliðarlínunni eftir niðurstöðu Hæstaréttar um málið. Aðspurð hvort að stjórnvöld muni fremur leitast við að leysa þetta mál í stað þess að dómskerfið þurfi að taka við þúsundir málsókna segist Lilja viss um að allir þeir sem eru með gengistryggð lán muni leita réttar síns því höfuðstóll þeirra lána hafi tvöfaldast.

„Vandamál stjórnvalda er að það verður að reka hvert og eitt mál því það er ekki leyfilegt vera með hópmálsókn,“ sagði Lilja og bætti við að mikið álag ætti einnig eftir að vera á dómskerfinu vegna mála frá sérstökum saksóknara og einnig þurfi að skera niður í dómskerfinu. Því þykir Lilju æskilegast að stjórnvöld reyni að leysa málið.

Það yrði gert með því að gengistryggðum lánum yrði breytt í venjuleg verðtryggð lán sem miðast við neysluvísitölu.

„Það kom fram í fréttum, og var bent á af Hagsmunasamtökum heimilanna, að Lýsing var ekki með neina kröfu til vara um að lánunum yrði breytt í vísitölulán. Ég geri ráð fyrir að þeir geri þá kröfu í hæstarétti og það verði niðurstaðan. Þetta verða þá venjuleg verðtryggð lán tengd neysluvísitölu.“