Fulltrúar Wikileaks, sem sérhæfir sig í því að leka viðkvæmum upplýsingum á netið, vonast til þess að Ísland verði innan tíðar athvarf fyrir rannsóknarblaðamennsku. Ekki er langt síðan fulltrúar Wikileaks lýstu þessu yfir.

Í viðtali við BBC segir Julian Assange, ritstjóri Wikileaks, að vonast sé til þess að ný lög sem eru í burðarliðnum muni veita þess háttar skjól fyrir leka viðkvæmra upplýsinga.

Íslenskur vinnuhópur, Icelandic Modern Media Initiative, eða Félag um stafrænt frelsi á Íslandi hefur að undanförnu beitt sér fyrir þess háttar lagabreytingum. Á vefsíðu vinnuhópsins kemur fram að eftir helgi verði lögð fram þingsályktunartillaga um að Ísland skapi sér afgerandi lagalega sérstöðu varðandi verndun tjáningar- og upplýsingafrelsis.

Wikileaks birti meðal annars viðkvæmar upplýsingar í tengslum við íslenska hrunið síðastliðið sumar þegar utanaðkomandi aðili lét lánabók Kaupþings inn á síðuna. Síðan þá hafa frekari gögn tengd hruninu ratað inn á síðuna og heimsóttu fulltrúar síðunnar Ísland á liðnu ári.

„Ef þessar breytingar verða að veruleika þá mun það hvetja alþjóðleg fjölmiðla- og internetfyrirtæki til að flytja hluta starfsemi sinnar þangað,“ sagði Assange í samtali við BBC í gær en hann hefur áður lýst því yfir að hugsanlega verði starfsmei Wikileaks flutt til Íslands.