Slökkviliðið hefur náð að slökkva eldinn sem kom upp í vélarrúmi skipsins Oddeyrinni við Hafnarfjarðarhöfn síðdegis í dag. Eldurinn var sem fyrr segir bundinn við vélarrúm skipsins en það var rétt fyrir klukkan fimm í dag sem tilkynnt var um mikinn reyk um borð í skipinu.

Slökkviliðið vinnur nú að því að kæla vélarrúmið áður en það verður reykræst. Ekki liggur fyrir hvað olli því að eldurinn kom upp og þar sem enn er töluverður reykur um borð í skipinu er erfitt að meta tjónið. Oddeyrin er 1.357 brúttótonna skuttogari í eigu Samherja á Akureyri.