Stúlka á fjórða aldursári virðist hafa sloppið ótrúlega vel þegar hún féll út um glugga úr fjölbýlishúsi í Þingholtunum á sjötta tímanum í kvöld. Lenti stúlkan á bíl sem var fyrir neðan og virðist hann hafa tekið af henni mesta fallið og mögulega bjargað því að ekki fór verr.

Að sögn varðstjóra hjá lögreglunni á höfuðborgarsvæðinu var tilkynnt um málið klukkan 17.52. Er talið að fallið hafi verið allt að sex metrar. Stúlkan var flutt með sjúkrabíl á slysadeild Landspítalans en að sögn varðstjóra var það mat lögreglumanns sem kom á vettvang að stúlkan hafi sloppið ótrúlega vel. Ekki er vitað um tildrög þess að stúlkan féll út um gluggann.