Ein af umfangsmestu aðgerðum embættis sérstaks saksóknara var gerð í Lúxemborg í vikunni. Húsleitir voru gerðar hjá Banque Havilland í Lúxemborg, sem tók við starfsemi Kaupþings á sínum tíma. Rannsóknin mun tengjast viðskiptum með hlutabréf í Kaupþingi og skuldatryggingum.

Sérstakur saksóknari, Ólafur Þór Hauksson, fór út á sunnudaginn til að bera saman bækur sínar við lögregluna í Lúxemborg en á þriðjudaginn var látið til skarar skríða með liðsinni á fjórða tug lögreglumanna.