Mikið hefur verið rætt um afskriftir skulda auðjöfra og sitt sýnist hverjum um sanngirni þess. Í helgarblaði DV er ítarlegt viðtal við Gylfa Magnússon efnahags- og viðskiptaráðherra og segir Gylfi að einfaldlega sé nauðsynlegt að horfa til þeirra með raunsæi.

„Það er hreinlega óhjákvæmilegt að afskrifa hluta þessara skulda því fyrirtækin munu aldrei geta staðið skil á þeim. Það þarf að horfast í augu við veruleikann og sjá að þessar gríðarlegu skuldir verði aldrei greiddar en sem mest verði að fá til baka. Það er ekki gert með því að leggja fyrirtæki niður heldur með því að endurreisa þau. Það þarf samt ekki að endurreisa þessar fyrirtækjablokkir og eignarhaldsfélög sem voru stórgalið fyrirbrigði.“

Gylfi segir það samt ekki óhjákvæmilegt að mennirnir sem stýra stórfyrirtækjum í þrot stýri þeim áfram. „Mér finnst líklega jafnógeðfelld og mörgum Íslendingum tilhugsunin um að þarna verði í mörgum tilfellum sama fólkið við stjórnvölinn en það verður að fara að reglum réttarríkisins. Þannig að ef menn hafa ekki verið dæmdir þá hafa þeir allan lagalegan rétt á að taka þátt í viðskiptalífinu. Þessir menn geta hins vegar þurft að víkja ef þeir hafa gengið svo mikið fram af samfélaginu að almenningur neiti hreinlega að stunda viðskipti við fyrirtæki þeirra.“