Áslaug Árnadóttir lögfræðingur, sem var starfandi ráðuneytisstjóri sumarið 2008, er samkvæmt heimilldum DV í hópi tólfmenninganna sem fengið hafa bréf frá rannsóknarnefnd Alþingis og geta neytt andmælaréttar næstu daga. Áslaug starfar nú sem lögfræðingur í Reykjavík. Hún var skrifstofustjóri í viðskiptaráðuneytinu í bankahruninu og átti síðar sæti í Icesave-samninganefndinni, sem Svavar Gestsson fór fyrir.

Kvisast hafði að Jón Sigurðsson fyrrverandi formaður Fjármálaeftirlitsins hefði verið í hópi þeirra sem fengu bréf frá rannsóknarnefndinni. Í samtali við DV í gær kannaðist hann ekki við að hafa fengið neina sendingu frá nefndinni.

Meðal þeirra sem fengu bréf frá rannsóknarnefndinni er Jónína S. Lárusdóttir ráðuneytisstjóri í efnahags- og viðskiptaráðuneytinu. Samkvæmt heimildum DV verða engar breytingar á högum Jónínu í ráðuneytinu nú hvað svo sem verður eftir að niðurstöður nefndarinnar verða birtar.