Helmingur landsmanna ætlar að borða hamborgarhrygg á aðfangadagskvöld, samkvæmt könnun MMR. Tæplega tíu prósent segjast ætla að borða rjúpu á meðan 8,3 prósent aðspurðra segjast ætla að borða kalkún.

Á jóladag sögðust 72,7 prósent landsmanna líklegast myndu borða hangikjöt og 8 prósent hamborgarhrygg. Segir á vef MMR að svo virðist sem breytileiki í jólamatnum sé aðeins meiri hjá landanum á aðfangadagskvöld en hefðir og venjur ráði ríkjum á jóladag.

Þá eru bornar saman niðurstöðurnar fyrir Ísland við könnun YouGov í Bretlandi. Sögðust 56 prósent Breta ætla að hafa kalkún í matinn á jóladag. Það er því af sem áður var þegar jólagæsin var vinsælust hjá Bretum en nú segjast einungis tvö prósent aðspurðra ætla að borða gæs á jóladag í ár.