Fyrrverandi ritstjórinn Jónas Kristjánsson vill að stjórnarskráin verndi fjölmiðla. Jónas er í framboði til stjórnlagaþings en hann segir fjölmiðla nánast alltaf vera dæmda seka fyrir móðganir. „Hver bófinn á fætur öðrum hótar fjölmiðlum öllu illu. Sigar lagatæknum á þá, sem ljósta upp um atferli þeirra. Vita, að íslenzkir dómstólar dæma slíkt á færibandi. Fjölmiðlar eru nánast alltaf sekir um móðganir. Meira að segja dæmdir fyrir að hafa rétt eftir viðmælendum sínum,“ skrifar Jónas á bloggsíðu sinni.

Hann segir lög og dómvenju um fjölmiðla vera út í hött á Íslandi, bæði í héraðsdómi og hæstarétti. „Svo er komið, að fjölmiðlar þora varla að skrifa um svínarí af því tagi, sem setti þjóðina á hausinn. Ný stjórnarskrá þarf að taka á þessu og knýja dómara til stefnubreytingar. Upplýsingafrelsi þarf að vera æðra hagsmunum peningabófa.“