Lífið gæti ekki verið betra í Newcastle akkurat þessa stundina en Newcastle lagði erkifjendur sína í Sunderland að velli í ensku úrvasldeildinni, 5-1. Til að bæta gráu ofan á svart hjá Sunderland var varnarmaðurinn Titus Bramble sendur af velli með rautt spjald en hann er fyrrum leikmaður Newcastle.

Kevin Nolan átti heldur betur góðan dag á St. James's Park en hann skoraði þrennu í þessum frábæra sigri Newcastle. Hann skoraði fyrstu tvö mörk leiksins á 26. og 34. mínútu en Shola Ameobi kom Newcastle í 3-0 áður en fyrri hálfleiknum lauk.

Shola Ameobi bætti svo við öðru marki sínu og fjórða marki Newcastle á 70. mínútu en fimmtán mínútum áður hafði fyrrum Newcastle-maðurinn Titus Bramble verið rekinn af velli. Kevin Nolan skoraði svo sitt þriðja mark með skalla á 75. mínútu áður en Darren Bent klóraði í bakkann fyrir Sunderland á lokamínútunum.

Með sigrinum komst Newcastle upp í fjórtán stig og heldur sjöunda sætinu. Sunderland er áfram í því ellefta með tólf stig.