Ólafur Ragnar Grímsson, forseti Íslands, segir að hann hafi orðið var við aukinn skilning og jafnvel stuðning í útlöndum í gær og í dag. Ólafur ræddi við blaðamenn á Bessastöðum í dag þar sem hann fór yfir atburðarás síðustu daga.

Ólafur nefndi sem dæmi leiðara Financial Times í morgun sem var hliðhollur Íslendingum. Margir hefðu óttast viðbrögð fjármálaheimsins – því væri afar mikilvægt að jafn virtur fjölmiðill og Financial Times hefði lýst yfir stuðningi við ákvörðun hans að vísa Icesave-málinu til þjóðarinnar. Þá hafi hann náð að útskýra málið í fjölmörgum erlendum fjölmiðlum í gær og í dag.

Ólafur sagði einnig á fundinum að það væri í raun skrítið ef stjórnvöld í Bretlandi og Hollandi færu að grípa til aðgerða út af þjóðaratkvæðagreiðslu. Þá svaraði Ólafur fyrir þá gagnrýni að hann hafi haft lítil samskipti við ríkisstjórnina um ákvörðun sína en til dæmis árið 2004 þegar hann synjaði fjölmiðlalögunum. Hann hafi fundað með fjórum ráðherrum á sunnudaginn og hlustað á rök sem þeir höfðu fram að færa.