26 ára gömul kínversk kona getur þakkað fyrir að vera á lífi eftir að hún féll fram af svölum á átjándu hæð á heimili sínu í Peking á dögunum.

Konan, sem heitir Ou samkvæmt kínverskum fjölmiðlum, var að hengja út þvott á svölunum þegar hún rann og hrapaði til jarðar.

Það varð konunni til happs að hún lenti á runnum sem þaktir voru snjó sem drógu af henni fallið. Talið er að fallið hafi verið um sextíu metrar.

Gangandi vegfarandi kom að Ou þar sem hún lá meðvitundarlítil á jörðinni. Hún var flutt á nærstatt sjúkrahús þar sem læknar meðhöndluðu hana. Hún slasaðist mikið og braut fjölda beina en er þó ekki í lífshættu.