Dómstóll í Zurich í Sviss hefur dæmt svissneskan auðmann til að greiða 36,5 milljónir króna fyrir hraðakstur. Bíll mannsins var mældur á 100 kílómetra hraða innanbæjar í litlu þorpi en maðurinn ók Ferrari Testarossa-lúxusbíl þegar hann var gómaður.

Fréttastofa Reuters greinir frá þessu en þar kemur fram að þetta sé ekki í fyrsta skipti sem maðurinn er stöðvaður vegna umferðarlagabrota. Dómari í málinu mat það svo að maðurinn hefði gerst sekur um vítaverða háttsemi.

Árið 2008 var ökuníðingur í Sviss dæmdur til að greiða tíu milljónir króna í sekt sem var met þá.