Birgir Hermannsson, aðjúnkt í stjórnmálafræði við Háskólann á Bifröst, telur að Bjarni Benediktsson þurfi, á einhverjum tímapunkti, að stíga fram og ræða um aðkomu sína að viðskiptum Vafnings. DV leitaði til nokkurra álitsgjafa og bað þá að velta fyrir sér stöðu Bjarna í ljósi aðkomu hans að viðskiptum eignarhaldsfélagsins Vafnings.

„Það er alltaf best, þegar um stjórnmálamenn er að ræða, að öll viðskipti þeirra séu ljós. Að því leytinu til er best fyrir þá að stíga fram og tjá sig um mál sem fyrst. Mönnum er yfirleitt ráðlagt, þegar svona mál koma upp, að stíga fram og leyna engu því líklegt er að sannleikurinn komi fram. En ef Bjarni telur sig hins vegar ekki hafa neitt meira um málið að segja þá auðvitað gerir hann það ekki. Þetta kann hins vegar að breytast ef það verður ákært í málinu og þá kann hann að þurfa þess,“ segir Birgir.

Þetta er atriði sem Birgir telur að sé veigamikið í umræðunni um stöðu Bjarna Ben vegna Vafningsmálsins: Hvort ákært verður í málinu eða ekki. Hann telur að ef forsvarsmenn Milestone og Sjóvár verða ákærðir vegna rannsóknar sérstaks saksóknara verði Bjarni að stíga fram og útskýra hvað hann vissi um Vafningsviðskiptin því slíkar ákærur gætu riðið honum að fullu.

„Þegar rannsókn saksóknarans er búin verða öll mál að vera skýr fyrir hann. Núna, á meðan þið eruð að flytja þessar fréttir, getur hann náttúrulega neitað að kommentara og sagt að hann hafi ekki komið nálægt þessari ákvarðanatöku. Ef saksóknari ákveður að ákæra einhvern út af bótasjóði Sjóvár verða spurningarnar sem hann þarf að spyrja sig að dálítið áleitnari. Þá er það ekki bara DV sem er að spyrja hann heldur ýmsir aðrir líka. Þetta er að því leytinu til erfitt mál fyrir Bjarna. Heildarmyndin í málinu er öll svolítið óljós þannig að yfir Bjarna er ákveðinn skuggi sem hann verður svo að hreinsa út þegar málið verður orðið opinbert, hvort sem það verður með ákæru eða ekki,“ segir Birgir sem telur jafnframt að fleiri sannanir þurfi við en veðsetningarumboðin til að sýna fram á það með óyggjandi hætti að Bjarni hafi komið að því að skipuleggja viðskiptin.