Orð sem Guðmundur Ólason, fyrrverandi forstjóri Milestone, lét falla í yfirheyrslum hjá sérstökum saksóknara benda til þess að strax í ársbyrjun 2008, að minnsta kosti, hafi eigendur og stjórnendur stórra eignarhaldsfélaga á Íslandi gert sér grein fyrir því að íslenska efnahagskerfið hafi verið að falli komið. Raunar mun Milestone frá 2007 hafa viljað færa fjármögnun sína úr landi því stjórnendur þess höfðu ekki trú á að íslenska fjármálakerfið stæði undir sér.

Út frá þessum orðum Guðmundar má því líta svo á að viðskiptin sem tengdust lánveitingunum út úr Sjóvá til Vafnings í febrúar 2008 hafi snúist um að Milestone hafi verið að kaupa sér tímabundinn gálgafrest með því að færa lán sín úr erlendum banka og yfir í íslenska efnahagskerfið vegna þess að erlendar fjármálastofnanir voru orðnar tregar til að veita íslenskum félögum lán. Ljóst er hins vegar að þó að þetta hafi verið tímabundin varnaraðgerð gat íslenska fjármálakerfið ekki staðið undir því til lengri tíma að taka við fjármögnun þessara félaga. Því má segja að hrunið hafi eiginlega verið hafið um þetta leyti þó svo að almenningur hafi ekki verið meðvitaður um það.

Um helmingurinn af rúmlega 30 milljarða tapi tryggingafélagsins Sjóvár á árinu 2008 var tilkominn vegna lánanna sem veitt voru til Vafnings og Racon Holding 29. febrúar 2008. Guðmundur mun hafa staðfest þetta í yfirheyrslunni hjá sérstökum saksóknara. Lánin voru afskrifuð í ársreikningi Sjóvár fyrir árið 2008. Guðmundur mun hins vegar ekki hafa getað staðfest hvernig Sjóvá tapaði hinum milljörðunum 15 sem eftir stóðu. Hugsanlegt er þó að það tap tengist einnig lánveitingunum sem Sjóvá veitti um þetta leyti.

Þetta er meðal þess sem Guðmundur Ólason, fyrrverandi forstjóri Milestone, mun hafa sagt í fimm klukkustunda langri yfirheyrslu hjá sérstökum saksóknara í ágúst í fyrra. Yfirheyrslan yfir Guðmundi mun hafa verið sú langmest upplýsandi af þeim yfirheyrslum sem haldnar voru yfir stjórnendum og eigendum Sjóvár í fyrra hjá sérstökum saksóknara í tengslum við rannsókn á mögulegum brotum á lögum um hluta- og tryggingafélög og hugsanlegum umboðssvikum.