Þór Sigfússon, fyrrverandi forstjóri Sjóvá, gerði sér ekki grein fyrir að Sjóvá ætti einungis annan veðrétt í eignum eignarhaldsfélagsins Vafnings þegar hann skrifaði upp á 10,5 milljarða lán til félagsins í febrúar 2008. Veðið fyrir láninu var í hálfbyggðum lúxusíbúðaturni í Asíu og breskum fjárfestingasjóði sem átti verslanir í Bretlandi. Glitnir átti fyrsta veðrétt í eignum Vafnings en bankinn hafði einnig lánað Vafningi.

Lánveitingarnar tengdust endurfjármögnun dótturfélaga Milestone og félaga í eigu Einars og Benedikts Sveinssona á lánum frá bandaríska fjárfestingabankanum Morgan Stanley sem bankinn neitaði að endurfjármagna vegna þeirra erfiðleika sem blöstu við í íslensku efnhagslífi. Endurfjármögnunin snerist um að dótturfélög Milestone gætu haldið hlutabréfum sínum í Glitni og sænska fjármála- og tryggingafélaginu Moderna. Milestone átti Glitnisbréfin með Einari og Benedikt.

Um svipað leyti og þetta á sér stað, í febrúar 2008, veðsetur Bjarni Benediktsson, þáverandi formaður BNT og þingmaður Sjálfstæðisflokksins, hlutabréf Benedikts, föður síns, og Einars, frænda síns, í Glitni. Glitnir átti, eins og áður segir, fyrsta veðrétt í eignum Vafnings og því átti Sjóvá ekki mikla möguleika á að fá eitthvað upp í kröfur tryggingafélagsins. Vafningslánið var á endanum afskrifað þegar reikningsárið 2008 var gert upp hjá Sjóvá.

Ítarlega er fjallað um yfirheyrslurnar í Milestone-málinu í helgarblaði DV.