Þann 29. febrúar 2008 áttu sér stað atburðir hjá Sjóvá sem eru lykilatriði í rannsókn sérstaks saksóknara á tryggingafélaginu og eiganda þess, Milestone. Stór hluti yfirheyrslnanna yfir Karli og Steingrími Wernerssonum og Guðmundi Ólasyni og Þór Sigfússyni mun hafa gengið út á að komast að því hvað átti sér stað þennan dag.

Þennan dag lánaði Sjóvá dótturfélögum Milestone samstals 15,7 milljarða króna. Þetta var 150 prósent af eigin fé félagsins. Fjármunirnir voru á endanum notaðir til að greiða bandaríska fjárfestingabankanum Morgan Stanley lán sem bankinn hafði veitt félögum í Milestone-samstæðunni til að kaupa hlutabréf í Glitni og sænska fjármála- og tryggingafyrirtækinu Invik. Því má segja að bótasjóður Sjóvár hafi verið notaður til að greiða erlendar skuldir sem Milestone-menn og viðskiptafélagar þeirra, Einar og Benedikt Sveinssynir, höfðu stofnað til við Morgan Stanley vegna hlutabréfakaupa.

Milljarðarnir 15 voru á endanum afskrifaðir úr bókum félagsins og skýra þessar lánveitingar um helming af 30 milljarða tapi tryggingafélagsins á árinu 2008.