Nokkrum reyndum starfsmönnum svæðisstöðva Ríkisútvarpsins á Akureyri, Ísafirði og Egilsstöðum hefur verið sagt upp störfum auk þeirra sem missa störf sín í höfuðustöðvum RÚV í Reykjavík.
Karli Eskil Pálssyni fréttamanni á Akureyri, Guðrúnu Sigurðardóttur á Ísafirði og Ásgrími Inga Arngrímssyni á Egilsstöðum hefur verið sagt upp störfum. Einum tæknimanni, Gunnlaugi Starra Gylfasyni, var einnig sagt upp störfðum á Akureyri.

Samkvæmt heimildum DV stendur til að leggja niður svæðistöðvar RÚV á Ísafirði og á Egilsstöðum í núverandi mynd og selja húseign RÚV á Egilsstöðum. Leigusamningi á húsnæði RÚV á Akureyri verður einnig sagt upp samkvæmt heimildum DV.
Þá hætta einnig störfum fréttamennirnir Friðrik Páll Jónsson, Guðrún Frímannsdóttir, Jóhanna Margrét Einarsdóttir og Borgþór Arngrímsson.

Varafréttastjórar úr Reykjavík mættu í svæðistöðvarnar í morgun til þess að tilkynna uppsagnir og breytingar.