Karl Wernersson sagðist í yfirheyrslum hjá sérstökum saksóknara ekki hafa vitað um 15,7 milljarða króna lánveitingar frá Sjóvá í lok febrúar 2008. Meðal annars fóru lánin til eignarhaldsfélagsins Vafnings sem eigendur Milestone áttu ásamt Benedikt og Einari Sveinssyni. Karl mun í yfirheyrslunum hafa sagst lítið hafa vitað um fjárfestingar og lánveitingar Sjóvár. Í stað þess benti Karl ítrekað á Þór Sigfússon.

Sérstakur saksóknari efnahagshrunsins, Ólafur Hauksson, rannsakar lánveitingar frá tryggingafélaginu Sjóvá til eignarhaldsfélagsins Vafnings og Racon AB sem veitt voru þann 29. febrúar árið 2008. Sömuleiðis rannsakar Ólafur tvær lánveitingar frá Glitni til Vafnings sem bárust líklega í gegnum eignarhaldsfélagið Svartháf.

Heimildir DV herma að í yfirheyrslunum yfir Karli og Steingrími Wernerssonum og Þór Sigfússyni á seinni hluta síðasta árs hafi þeir verið spurðir ítarlega um lánveitingarnar og tilgang þeirra.

Í yfirheyrslunum yfir Karli mun hafa komið fram að hann, sem var stjórnarformaður Sjóvár og Milestone á þeim tíma sem Sjóvá lánaði Vafningi fjármunina, hafi ekki vitað um 15,7 milljarða lánveitingar til Vafnings og annarra dótturfélaga Milestone þennan dag. Karl skrifaði reyndar ekki undir lánasamningana heldur voru það eingöngu Þór Sigfússon, forstjóri Sjóvár, og Sigríður Inga Guðmundsdóttir, framkvæmdastjóri fjármálasviðs félagsins. Þór skrifaði undir fjóra samninga og Sigríður undir einn.
Almennt séð mun Karl hafa verið sérlega óhjálplegur í yfirheyrslunum og sagt er að hann hafi lítið vitað um það sem starfsmenn sérstaks saksóknara spurðu hann um. Aðrar heimildir DV herma hins vegar að Karl hafi haft tögl og hagldir í Milestone-veldinu.

2. hluti umfjöllunar DV um Milestone-yfirheyrslurnar hjá sérstökum saksóknara hrunsins birtist í helgarblaðinu sem kemur út í dag.