Aðalbjörn Sigurðsson fréttamaður á RÚV og formaður Félags fréttamanna segir að starfsfólk stofnuninnar hafi ekki búist við jafn miklum niðurskurði eins og tilkynntur var í dag. „Við sitjum hér og sjáum eftir góðu samstarfsfólki og vinum og reynum að jafna okkur.“

Páll Magnússon útvarpsstjóri kynnti uppsagnirnar með starfsmönnum í dag.

Aðalbjörn segir starfsfólk stofnuninnar sorgmætt. „Hlutverk okkar sem eftir eru að gera okkar besta. Það breytir því ekki að svona uppsagnir hafi ekki áhrif. Geta fréttastofunnar til að fjalla um stór málefni skerðist.“

Hann segir stjórnvöld ráða að endingu yfir stofnuninni og furðar sig á þunga niðurskurðarins hjá RÚV miðað við aðrar ríkisstofnanir. „Það virðist vera að stjórnvöld vilji frekar hafa fólkið á atvinnuleysisskrá en í vinnu hér. Ég veit að það á spara, en er ekki hægt að fara jafnar yfir? Mér finnst þetta alveg fáránlega blóðugt,“ segir Aðalbjörn Sigurðsson. „Við áttum von á uppsögnum en ekki svona miklum. Við höfðum beðið eftir þessu í tvo mánuði, en við vissum ekki að þetta yrði þetta mikið högg.“

Yfirlýsing frá stjórn Félags fréttamanna vegna niðurskurðar á Fréttastofu Ríkisútvarpsins.

Vegna þeirrar ákvörðunnar Alþingis að hirða tíunda hluta útvarpsgjaldsins hafa nú um fimmtíu starfsmenn Ríkisútvarpsins misst vinnuna. Sumir voru launamenn en aðrir verktakar, langflestir í fullu starfi og stór hluti vann á Fréttastofunni, bæði í Reykjavík og úti á landi. Stjórn Félags fréttamanna harmar að nú sé ráðist í þriðja sinn á stuttum tíma að Fréttastofu Ríkisútvarpsins með blóðugum niðurskurðarhnífi.

Stutt er frá því helsta tekjustofni Ríkisútvarpsins var breytt með lögum frá Alþingi úr því að vera afnotagjald sem stofnunin innheimti sjálf, yfir í að vera nefskattur sem ríkið innheimtir með öðrum sköttum. Blekið var varla þornað á hinum nýju lögum þegar Alþingi ákvað að taka hluta nefskattsins til sín. Þessi óheiðarlega framkoma löggjafasamkundunar er með ólíkindum, einkum þegar haft er í huga að á sama tíma styrkir ríkið aðra fjölmiðla um milljarða króna með niðurfellingum skulda í gegnum opinbera banka.

Ljóst er að geta Fréttastofunnar til faglegrar og vandaðrar umfjöllunar er verulega sködduð vegna vanhugsaðra ákvarðanna Alþingis og ríkisstjórnar. Sjaldan hefur þó verið meiri þörf á vönduðum og áræðanlegum fréttum en nú. Stjórn félags fréttamanna spyr hvort tilgangurinn sé að draga svo mátt úr Fréttastofunni að hún verði ófær um að sinna lögbundnu og lýðræðislegu eftirlits- og aðhaldshlutverki sínu?

Ábyrgðin hvílir á herðum ríkisstjórnarinnar og Alþingis, sem nú hafa opinberað algert virðingarleysi sitt fyrir Ríkisútvarpinu, hlutverki þess, starfsfólki og eigendum. Sérhver alþingismaður ber persónulega ábyrgð á uppsögnunum.

Stjórn félags fréttamanna.